Brúarásskóla var slitið 1. júní sl. Viðurkenningar hlutu Magnús í Hofteigi fyrir framfarir í lestri, Sigmar Stefán fyrir almennar framfarir í námi, Sunna Ross hlaut viðurkenningu fyrir dönskunám og prúðmennskuverðlaun komu að þessu sinni í hlut Álfgerðar á Kirkjubæ. Kennarar veittu einnig tveimur foreldrum sérstakar viðurkenningar, þeim Steinunni Snædal fyrir að kenna dans í sjálfboðavinnu í vetur, og Gunnþóri Jónssyni fyrir að halda úti fótboltaæfingum í vetur, einnig án þess að fá greitt fyrir. Við þökkum þeim kærlega fyrir framlag þeirra til skólastarfsins hér.

Við minnum á foreldradaginn 9. júní nk. kl. 14:00. Skóli hefst aftur 25. ágúst. Hafið það gott í sumar :-)

Skákmót grunnskóla á Fljótsdalshéraði fór fram í Egilsstaðaskóla þriðjudaginn 20. apríl. Alls tóku 86 nemendur úr skólunum fjórum þátt. Tefldar voru fimm umferðir. Sigurvegari mótsins var Nökkvi Jarl Óskarsson í 9. bekk Egilsstaðaskóla. Auk þess voru veitt verðlaun fyrir þrjú efstu sætin í drengja- og stúlknaflokki í þremur aldurshópum; 1.-4. bekk, 5.-7. bekk og 8.-10. bekk.

Brúarásskóli átti níu nemendur á mótinu og þeir stóðu sig með mikilli prýði. Æsa Katrín Sigmundsdóttir vann gullverðlaun í flokki 1.-4. bekkjar stúlkna og Guðný Edda Guðmundsdóttir varð í þriðja sæti í flokki stúlkna á miðstigi. Ennfremur var Magnús Fannar Benediktsson valinn til að keppa á kjördæmaskákmóti í næstu viku fyrir hönd skólans, vegna góðrar frammistöðu.